Дінмуса парламентлӧн Президиумса чукӧртчӧм вылын кыпыда нимӧдісны Коми Республикаса Каналан Сӧветлысь выль ӧтуввез-портал

Кӧч тӧлысь 9 лунӧ дінмуса парламентлӧн Президиумса чукӧртчӧм вылын кыпыда нимӧдісны Коми Республикаса Каналан Сӧветлысь выль ӧтуввез-портал. Сійӧс нуӧдіс КР юӧр да связь комитетӧн юрнуӧдысь Александр Селютин.

Сы серти сійӧ артмис ышӧдана да ӧнія кадся, навигацияын, эргономикаын да дизайнын водзын мунысь шедӧдӧмторъяс пыртӧмӧн.

«Ми Каналан Сӧветса Аппараткӧд ӧтув кӧсйим лӧсьӧдны портал, кутшӧмлӧн тэчасыс кутас вежсьыны оланпас пыртан орган водзын сулалысь могъяс серти да чайта, мый миян тайӧ артмис. Тайӧ медводдза сайт выль  интерактивнӧй платформаын, локтан кадӧ сэтчӧ вуджасны мукӧд  госорган», – висьталіс Александр Селютин.

Выль сайтыс роч да коми кывъя, а сідзжӧ эм синтӧмаяслы версия. Тані ёна паськӧдӧма мультимедийнӧй позянлунъяс: вӧдитчысьяс вермасны уджавны видеоӧн, аудиоӧн да фотоматериалъясӧн. Та кындзи ӧтвывтӧма социальнӧй везъяскӧд.

Кыдзи пасйис Каналан Сӧветӧн Веськӧдлысь Игорь Ковзель, выль ӧтуввез-порталлӧн медшӧр могыс кокньӧдны оланпас пыртысьяслысь да республикаса олысьяслысь ӧтувъя удж.

«Выль портал бурджык важсьыс. Быд сикас юӧр позьӧ ӧдйӧ аддзыны. Талун позьӧ кокниа да ӧдйӧ депутатлы сетны юалӧм, гижны письмӧ, пысавны документ», – висьталіс дінмуса парламентӧн Веськӧдлысь.

Выль ӧтуввез-портал меститчис важ инпас серти http://gsrk.ru/