КР-ын МВД-ӧн да дінмуса йӧзӧс велӧдан министерствоӧн котыртӧм «Безопасное колесо» республиканскӧй конкурс-ордйысьӧм кыпыда восьтісны Сыктывкарын кӧч тӧлысь 17 лунӧ. Конкурсса участникъяс да котыртысьяс дорӧ чолӧмалана кывйӧн шыӧдчис Коми Республикаса Каналан Сӧветӧн Веськӧдлысь Игорь Ковзель.

«Тайӧ конкурс – кывкутана да тӧдчана ордйысьӧм. Сійӧ оз сӧмын велӧд туйвывса правилӧяс, а чужтӧ кужӧмъяс да сям, кутшӧмъяс отсалӧны гӧгӧрвоны да водзвыв тӧдны туйвывса серпас. Талун чукӧртчисны йӧз, кодъяслы абу веськодь, кутшӧм серпасыс странаса туйяс вылын да кодъяслы медшӧр донаторнас лоӧ олӧм!», - пасйис И. Ковзель.

Конкурсын участвуйтісны республикаса каръясысь да районъясысь 20 команда, найӧ ставӧн вермисны мутасса ордйысьӧмъясын. 10 арӧссянь 12 арӧсӧдз конкурсса участникъяслы ковмас петкӧдлыны туйвывса правилӧяс тӧдӧм, «автогородкын» велосипедӧн ветлыны кужӧм, фигурнӧя ветлӧм да медводдза медицина отсӧг сетӧм, а сідзжӧ творческӧй кужанлунъяс. Конкурсыс заводитчис 36 во сайын, кор лӧсьӧдісны Ухтаын туйвывса том инспекторъяслысь медводдза отряд, талун татшӧм отрядыс 45.

Коми Каналан Сӧветӧн Веськӧдлысь серти, дінмуса парламентын быд во видлалӧны да могмӧдӧны сьӧмӧн «Коми Республикаын туй вылын  безопасносьт ёнмӧдӧм» республиканскӧй торъя мога уджтас. «Тайӧ уджтас отсӧгӧн бурмӧдӧны автомашина туйяс, индӧны выль туйвывса пасъяс, ньӧбӧны регыдъя медицина отсӧг бригадаяслы  медицина оборудование,  мобильнӧй городокъяс, ворсан велӧдчан пособиеяс», – тӧдчӧдіс И. Ковзель.