Пекничаӧ кӧч тӧлысь 19 лунӧ арся сессиялӧн медводдза чукӧртчӧм дырйи Коми Республикаса Каналан Сӧветлӧн депутатъяс видлаласны «Йӧзлы социальнӧй отсӧг йылысь» оланпасӧ вежсьӧмъяс пыртӧм йылысь оланпас бала, торйӧн кӧ, нӧбасьысь аньяслы транспорт рӧскодъяс вештӧм да вермытӧм челядьлӧн бать-мамлы да опекунъяслы компенсация сетӧм.

Талунъя «Йӧзлы социальнӧй отсӧг йылысь» оланпас урчитӧ 2012 вося тӧвшӧр тӧлысь 1 лунсянь 2014 вося ӧшым тӧлысь 31 лунӧдз вештыны нӧбасьысь аньяслы, кодъяс олӧны республикаса сьӧкыда воӧдчана инъясын,  дінмуса медицина учреждениеӧдз мунӧмысь рӧскодъяс, а сідзжӧ быд тӧлысь сетны компенсация ӧтка олысь уджавны вермана уджтӧмалысь бать-мамлы/опекунлы, кодъяс быдтӧны 18 арӧсӧдз вермытӧм челядьӧс. Видлалан оланпас балаыс нюжӧдас тайӧ оланпаслысь вына кадколастсӧ 2017 вося ӧшым тӧлысь 31 лунӧдз.

Каналан Сӧветлӧн социальнӧй политика комитетӧн веськӧдлысь Михаил Брагин тӧдчӧдіс, мый оланпасыс вына кык во да петкӧдліс, мый нӧбасьысь аньяслы туйвывса рӧскодъяс вештӧм ёна коланатор. «Миян  республикаын уна сьӧкыда воӧдчана ин, кытысь позьӧ локны сӧмын  авиация транспортӧн. Нӧбасьысь аньлы ёна дона лоас ветлыны больничаӧ туялӧм вылӧ да кага вайӧм могысь, – пасйис депутат, – та вӧсна тайӧ социальнӧй отсӧгыс зэв колана».

Оланпас пыртысьяс серти ёна тӧдчанаӧн лоӧ вермытӧм челядьӧс быдтысь бать-мамлы отсалӧм. Михаил Брагин торйӧн пасйис, мый оланпас балалӧн медшӧр могыс – видзны торъя категорияа гражданлы социальнӧй отсӧг сетӧмлысь водзынджык шедӧдӧм тшупӧд.

Оланпас баласӧ сьӧмӧн могмӧдас Республиканскӧй сьӧмкуд, сійӧс збыльмӧдӧм вылӧ колана сьӧмсӧ быть урчитасны. Коми Республикаса Каналан Сӧветлӧн социальнӧй политика комитет дась видзӧдны тайӧ оланпас бала збыльмӧдӧм бӧрся.