Коми Республикаса Каналан Сӧветын мунiс уджалан сӧвещание, кӧнi видлалiсны «Йӧзӧс велӧдӧм сӧвмӧдӧм» КР канму уджтас. Мероприятиесӧ нуӧдiсны «2015 во да 2016-2017 воясся планӧвӧй кадколаст вылӧ Коми Республикаса республиканскӧй сьӧмкуд йылысь» КР оланпас бала видлалан мероприятиеяслӧн план серти.

Кыдзи пасйис водзкывйын КР Каналан Сӧветлӧн социальнӧй политика комитетӧн веськӧдлысь Михаил Брагин, йӧзӧс велӧдӧм вӧлi и лоас Коми Республика сӧвмӧдӧмлӧн векртуйӧн.

«Республикаса велӧдан тэчаслӧн медшӧр могыс – оланiн, социальнӧй да эмбура статус, дзоньвидзалун вылӧ видзӧдтӧг сетны быд гражданинлы позянлун тыр-бура велӧдчыны быд тшупӧдын», – тӧдчӧдiс депутат.

Коми Республикаса велӧдан министр Владимир Шарков серти, уджтасӧ пырӧ 6 уджтасув, 2013-2017 воясын сьӧмӧн могмӧдасны 91 623 939,2 сюрс шайт вылӧ.

Уджтаслӧн верктуйясӧн кыдзи и пыр лоасны – велӧдан учреждениеяслысь удж донъялӧмлысь независимӧй тэчас лӧсьӧдӧм кузя удж,  материально-техническӧй база ёнмӧдӧм, а сiдзжӧ отрасльлы кадръясӧс сӧвмӧдӧм да школаӧдз челядьӧс видзанiнъясын местаяс содтӧм. 2014 вося йирым тӧлысь 1 лун вылӧ Комиын школаӧдз тӧдӧмлунъяс босьтӧны восянь 6 арӧсӧдз челядь пиысь 86,9% прӧчент, 3 арӧссянь 7 арӧсӧдз – 99,8% прӧчент. Тайӧ петкӧдласъясыс ёна ыджыдджыкӧсь Россия Федерацияын да Рытыв-Войвыв федеральнӧй кытшын шӧркодь петкӧдласъяс серти.

Уджтас видлалiгӧн депутатъяс юасисны, кыдзи дiнмуын разьӧны коми кыв велӧдӧмкӧд да школаса формакӧд йитчӧм мытшӧдъяс. Нӧшта кыпӧдлiсны инклюзивнӧй велӧдӧм кузя специалистъясӧс дасьтӧм кузя, велӧдысьяслы удждонъяс содтӧм кузя да велӧдысьясӧс  вердӧм кузя юалӧм.

Нӧшта парламентарийяс кыпӧдлiсны патриотическӧя быдтӧм-сӧвмӧдӧм йылысь да армия кежлӧ велӧдчысьясӧс дасьтӧм йылысь юалӧмъяс. Йӧзӧн бӧрйӧмаяс пасйисны, мый талунъя канму уджтаслы талы абу тырвыйӧ урчитӧма.

«Видлалӧмыс артмис ышӧдана да тырвыйӧ, ми весиг кадысь унджык уджалiм. Вӧзйисны уна конструктивнӧй стӧчмӧдӧм да ме эска, мый йӧзӧс велӧдан министерство босьтас найӧс тӧд вылӧ», – пасйис Михаил Брагин.