Йирым тӧлысь 14 лунӧ Коми Республикаса Каналан Сӧветын мунiс уджалан сӧвещание, кӧнi видлалiсны республикаса кык канму уджтас: «Экономика сӧвмӧдӧм» да «Промышленносьт сӧвмӧдӧм». Мероприятиесӧ нуӧдiсны «2015 во да 2016-2017 воясся планӧвӧй кадколаст вылӧ Коми Республикаса республиканскӧй сьӧмкуд йылысь» Коми Республикаса оланпас бала видлалан мероприятиеяслӧн план серти.

Сӧвещание восьтiгӧн Коми Республикаса Каналан Сӧветӧн Веськӧдлысь Игорь Ковзель пасйис, мый коймӧд во нин дiнмуса сьӧмкуд лӧсьӧдӧны канму уджтасъяс подув вылын да пӧшти ставсӧ депутатъяс водзвыв видлаласны. Ставнас планируйтӧма кызьысь унджык мероприятие.

«Сьӧмкуд лоис тыдаланаджыкӧн. Ми аддзам быд шайт, мый мунӧ  муниципалитетъяслы, отрасльяслы, шуам, йӧзлысь дзоньвидзалун видзӧм, йӧзӧс велӧдӧм, экономика да мукӧд. Депутатъяс да республикаса олысьяс, кодъяслы абу веськодь республикалӧн олӧмыс, кокньыдджыка кутiсны видлавны сьӧмкуд», – пасйис Игорь Ковзель.

Сiйо содтiс, мый колян воын ӧткымын уджтассӧ видлалiсны некымынысь сы вӧсна, мый депутатъяслӧн лоисны профильнӧй министерствоясӧс петкӧдлысьяс дорӧ юалӧмъяс.

Кыдзи висьталiс КР экономика сӧвмӧдан министр Владимир Бармашов, республикаса экономика сӧвмӧдан уджтасӧ пырӧ 8 уджтасув, ставнас 2013-2017 воясын сьӧмсӧ вичмӧдӧма 2 273 499,1 сюрс шайт. Унджык сьӧмыс – 1 616 208,6 сюрс шайт – республикаса сьӧмкудйысь. Министр серти, уджтасса петкӧдласъяслысь серпассӧ лёкмӧдiс ортсы экономика. Медым санкцияяс эз лёкмӧдны миянлысь олӧм, колӧ отсавны меставывса тӧвар вӧчысьяслы, а сiдзжӧ ӧлӧдны донъяс да тарифъяс подувтӧг содӧм.

Уджтас видлалiгӧн депутатъяс пасйисны, мый колӧ отсавны сиктса районъясын ичӧт предпринимательстволы да урчитны торъя мутасъясын экономика сӧвмӧдӧмлысь верктуйяс. Йӧзӧн бӧрйысьяс серти, тайӧ отсалас кыскыны республикаӧ инвесторъясӧс, кодъяс пиысь унаӧн оз тӧдны ышӧдана проектъяс йылысь, кутшӧмъясӧс позьӧ пӧртны дiнмуын.

Промышленносьт сӧвмӧдӧм кузя уджтас йылысь юӧртiс КР  промышленносьт да транспорт сӧвмӧдан министерствоӧн юрнуӧдысь Андрей Самоделкин. Сы серти, верктуйяс пиын производствоса вынйӧр содтӧм да ӧнiя технологияясӧн вӧдитчӧм. Кутiсны уджавны биоломтас вӧчан некымын выль предприятие, дасьтӧны уджӧдны электростанция, кодi кутас уджавны  Сыктывкарса ЛДК-лӧн колясъяс вылын.

Уджтаслысь тайӧ да мукӧд мог збыльмӧдӧм вылӧ куим воын видзасны 296 502,2 сюрс шайт, 224 602,2 сюрс шайтыс республиканскӧй сьӧмкудйысь.

Депутатъяслы вочавидзигӧн министр пасйис, мый абу на урчитӧма республикаса мутасын мупытшса озырлун выль перъянiнъяс лӧсьӧдӧмлысь план сы вӧсна, мый мирса рынок вылын зумыдтӧмлун вӧсна инвесторъяс видзчысьоны.

Министрлысь юасисны и школаса форма йылысь. РКпп

Андрей Самоделкин серти, республикаын эм производствоыс Воркутаын, Сосногорскын, Ухтаын да Сыктывкараын. Но ставыс конкурентъяслӧн паськӧм да донъяс доро торъя корӧмъяс сайын.

Кыдзи пасйис КР Каналан Сӧветлӧн сьӧмкуд, вот да экономическӧй политика комитетӧн веськӧдлысьӧс вежысь Иван Медведев, депутатъяслысь стӧчмӧдӧмъяссӧ да вӧзйӧмъяссӧ сетасны профильнӧй министерствояслы.