Коми Республикаса Каналан Сӧветын уджалан сӧвещание вылын видлалісны «Вӧр-ва озырлун мӧдпӧлалӧм да вӧдитчӧм да гӧгӧртас видзӧм» КР канму уджтас. Мероприятиеыс муніс «2015 во вылӧ да 2016 да 2017 воясся планӧвӧй кадколаст вылӧ республиканскӧй сьӧмкуд йылысь» КР  оланпас бала видлалӧм могысь.

Коми Республикаса вӧр-ва озырлун да гӧгӧртас видзан министрлысь уджмогъяс пӧртысь Роман Полшведкин серти, 2013-2017 воясын уджтассӧ сьӧмӧн могмӧдасны 2 миллиард шайтысь унджык вылӧ. Унджык сьӧмыс воӧ республиканскӧй сьӧмкудйысь.

Уджтас презентация дырйи медся ёна сёрнитісны ёг йылысь.

Сӧвещаниеӧн юрнуӧдіс Вӧр-ва озырлун, вӧр-ваӧн вӧдитчан да экология комитетӧн веськӧдлысьӧс вежысь А.В. Бушуева. Сійӧ пасйис ёсь мытшӧд, коді йитчӧма лӧсялана канму реестрӧ пырттӧм объектъясӧ колясъяс иналӧмкӧд. Росприроднадзорлӧн тшӧктӧдӧн вынсьӧдӧм Коми Республикаын реестрӧ пыртӧма сӧмын  9 объект – Интаын 7 шахтаса отвалъяс, Усинскын 1 шламонакопитель Воркутаын бытӧвӧй колясъяслы 1 полигон. Восьсаӧн кольӧ реестрӧ пырттӧм шыблаланінъясӧн вӧдитчӧм кузя юалӧм.

Роман Полшведкин пасйис, мый республикаын оланпастэчаслӧн корӧмъяс серти лӧсялӧ сӧмын ӧти чорыд бытӧвӧй колясъяслы полигон, кутшӧм меститчӧма Вуктылын. Выльяслысь стрӧитӧмсӧ нюжӧдӧны уна сикас помка вӧсна. Депутатъяс вӧзйисны республикаса министерстволы зільджыка кыскыны тайӧ сфераӧ канму-ас партнёрство кузя  бизнесӧн, а сідзжӧ торйӧн чукӧртны ёг. Кыдзи висьталіс министрлысь уджмогъяс пӧртысь, бурланьӧ сӧвмӧ пу колясъясӧн вӧдитчӧм, республикаын уджалӧны пеллетъяс да шолля ломтас вӧчан некымын предприятие.

Нӧшта йӧзӧн бӧрйӧмаяс юасисны, кыдзи гырысь промышленнӧй предприятиеяс тшыкӧдӧны гӧгӧртас, туялӧны-корсьӧны мупытшса озырлун, зумыдмӧдӧны берегъяс, а сідзжӧ босьтӧны-ӧ тӧд вылӧ меставывса олысьяслысь кӧсйӧмъяссӧ мупытшса озырлун перйигӧн да кыйсян-вӧралан овмӧсса артмӧдчӧмъяс кырымалігӧн. Став юалӧм серти Минприродыӧс, а сідзжӧ вӧр-васа федеральнӧй тэчасъясӧс петкӧдлысьяс тырвыйӧ вочавидзисны да гӧгӧрвоӧдісны.