Коми Республикаса Каналан Сӧветлӧн оланпастэчас да меставывса асвеськӧдлӧм кузя комитетӧн веськӧдлысь Владимир Косов участвуйтіс «РФ-ын административнӧй да административно-процессуальнӧй оланпастэчас сӧвмӧдӧм кузя тӧдчана юалӧмъяс» тема серти «гӧгрӧс пызанын».

Мероприятиеыс муніс РФ ФС Федерацияса Сӧветын, кӧні участвуйтісны сенаторъяс, федеральнӧй да дінмуса власьт органъясӧс, РФ общественнӧй палатаӧс, велӧдан да наука учреждениеясӧс петкӧдлысьяс.

«Гӧгрӧс пызанын» участникъяс пасйисны административнӧй кывкутӧм, торйӧн нин Административнӧй инӧд торкалӧмъяс йылысь Россия Федерацияса кодекс да сы серти РФ субъектъяслӧн примитӧм оланпастэчас актъяс, бурмӧдӧм кузя мытшӧд.

Кыдзи пасйис В. Косов, артмӧм мытшӧдъясӧ позьӧ пыртны Кодексӧн урчитӧм инӧда нормаяслысь моральнӧя важмӧм санкцияяс, уна состав серти вывті стрӧг санкцияяс, а сідзжӧ Кодексын пытшкӧсса логикаын тырмытӧмторъяс да торкалӧмъяс. Ёсь мытшӧдъясӧ пырӧ и уна инӧда актӧн вӧдитчӧмын мытшӧдъяс да Кодекслӧн вывті ыджыд объём.

«РФ КоАП колӧ тырвыйӧ вежны. Сійӧ вынсявліс 12 во сайынт. Тайӧ кадколастӧ Кодексӧн ладмӧдан ӧтйӧза йитодъясын лоис уна тӧдчана вежсьӧм. Сэтчӧ пыртісны кык сюрс гӧгӧр вежсьӧм, но оз ставыс лӧсяв нормативнӧй актлӧн медводдза концепциялы», - тӧдчӧдіс В. Косов.

Нӧшта ӧти тӧдчана мытшӧд йитчӧма сыӧн, мый збыль вылас оз став административнӧй накажитӧм збыльмӧдны, торйӧн нин административнӧй штрапъяс мынтӧмын да та вӧсна колӧ бурмӧдны найӧс перъян ногъяс. Нӧшта В. Косов серти, талун бурланьӧ вежсьӧ серпасыс штрапъяс перйӧмын. Тайӧ йитчӧма сыӧн, мый бурджыка кутісны уджавны олӧмӧ пӧртысь федеральнӧй власьт органъяс, кодъяс отсалӧны ас кадӧ ыстыны административнӧй материалъяс да пыртны уджӧ ӧнія технологияяс, сы лыдын инӧд торкалӧмъяс фото- да видеофиксация средствояс. Та серти уджалӧны и Россия Федерацияса субъектъяслӧн канму власьт органъяс. Сідз Коми Республикаса Каналан Сӧвет вӧзйис Административнӧй инӧд торкалӧмъяс йылысь РФ кодексӧ стӧчмӧдӧмъяс пыртан бала, кӧні вӧзйӧма содтыны кадколаст туй вылын административнӧй инӧд торкалӧмъяс йылысь делӧ кузя шуӧм дасьтӧм вылӧ кык тӧлыссянь квайт тӧлысьӧдз.

В. Косов серти, «гӧгрӧс пызанын» участникъяс лӧсьӧдісны уна вӧзйӧм, кутшӧмъясӧс видлаласны да донъяласны Каналан Думаын да Федерацияса Сӧветын.