Коми Республикаса Каналан Сӧветын муніс уджалан сӧвещание, кӧні видлалісны «Юӧртан общество» КР канму уджтас. Мероприятиеыс муніс «2015 во да 2016-2017 воясся планӧвӧй кадколаст вылӧ Коми Республикаса республиканскӧй сьӧмкуд йылысь» КР оланпас бала видлалан мероприятиеяслӧн план серти.

Кыдзи висьталіс КР юӧр да связь комитетса юрнуӧдысь Александр Селютин, канму уджтасӧ пырӧ 6 уджтасув,  2013-2017 воясын сьӧмӧн могмӧдасны нёль да джын миллиард шайтысь унджык вылӧ. Торйӧн кутасны сӧвмӧдны канму да муниципальнӧй власьт органъяс да отрасльса юӧртан тэчасъяс котсын электроннӧя уджалӧм, ёнмӧдны юӧр сетан инфраструктура да безопасносьт.

Уджтас видлалігӧн депутатъяс юасисны, кыдзи сӧвмӧдӧны уна могм шӧринъяс. Александр Селютин серти,  республикаын уджалӧны нин 4 МФЦ, а локтан кадӧ ставнас лоас 10. Содӧ и электроннӧя сетан услугаяслӧн лыдыс.

Юӧр сетан да связь комитетса юрнуӧдысь пасйис, мый федеральнӧй тшупӧдын миян дінму мӧд местаын республикаын универсальнӧй электроннӧй карта пыртӧм кузя. Медводдзаын Тула обласьт. Регыдъя кадӧ Усинскын кутас уджавны УЭК-лы транспортса приложение.

Та кындзи сӧвещание вылын видлалісны ылі олан пунктъяс сотӧвӧй связьӧн могмӧдӧм, а сідзжӧ дзоньвидзалун видзан да йӧзӧс велӧдан учреждениеяс уджӧ юӧр сетан технологияяс пыртӧм.