Коми Республикаса Каналан Сӧветын муніс уджалан сӧвещание, кӧні видлалісны «Йӧзӧс социальнӧя дорйӧм» КР канму уджтас. Мероприятиеыс муніс «2015 во вылӧ да 2016 да 2017 воясся планӧвӧй кадколаст вылӧ республиканскӧй сьӧмкуд йылысь» КР  оланпас бала видлалӧм могысь.

Документӧн тӧдмӧдіс удж да социальнӧя дорйӧм кузя министрӧс медводдза вежысь Олимпиада Шуктомова. Сы серти, верктуйясӧн лоӧны канмуӧн социальнӧй кӧсйысьӧмъяс олӧмӧ пӧртӧм, социальнӧй могмӧдӧмлысь качество кыпӧдӧм, материально-техническӧй база ёнмӧдӧм да социальнӧя уджалысь НКО-лы отсалӧм – талы лӧсьӧдӧма торъя уджтасув. Ставнас 2013-2017 вояс вылӧ уджтас вылӧ урчитӧма 48 миллиард шайтысь унджык.

Медся ёна вензисны бать-мамтӧс челядьӧс оланінӧн могмӧдӧм кузя. Кыдзи пасйис министрӧс вежысь, талун ӧчередьын сулалӧ 1355 морт. Бӧръя воын лыдыс содіс сы вӧсна, мый пыртісны вежсьӧмъяс федеральнӧй оланпастэчасӧ, мый серти учёт вылӧ сувтӧдӧны оз дас кӧкъямыс арӧссянь, а  дас нёль арӧссянь.

Депутатъяс вӧзйисны урчитны республика пасьтала бать-мамтӧм челядьлы олан плӧшадьлысь ӧтувъя нормативъяс. Талун тайӧ 10 квадрата метрсянь 33 квадрата метрӧдз. Социальнӧй политика комитетӧн веськӧдлысь Михаил Брагин серти, профильнӧй министерстволы колӧ зільджыка уджавны тайӧ мытшӧд серти.

«Ми гӧгӧрвоам, мый нормативъяс содтӧм вӧсна ковмас содтӧд сьӧм, но ми лыддям, мый колӧ урчитны 33 квадрата метра ӧтувъя мында. Мӧвпала, мый локтан во заводитчигӧн ми нуӧдам тайӧ тема серти министерствоӧс петкӧдлысьяскӧд торъя сӧвещание да видлалам став ёсь юалӧм», – тӧдчӧдіс депутат.

Та кындзи, сӧвещание вылын видлалісны вермытӧмъясӧс  транспортӧн могмӧдӧм, социальнӧй юкӧнса уджалысьяслы удждонъяс содтӧм да мукӧд мытшӧд.

Канму уджтас видлалігӧн Коми Республикаса Каналан Сӧветӧн Веськӧдлысь Игорь Ковзель пасйис омӧля ветлысь йӧзлы пандусъяскӧд йитчӧм мытшӧд. Сы серти, мый керка йӧръясын этша места яндысьтӧм машина вӧдитысьяс тшӧкыда кольӧны ассьыныс машинаяссӧ да тупкӧны вермытӧмъяслы пандусъяс дорӧ туй. Игорь Ковзель вӧзйис корсьны петан туй профильнӧй  министерстволы ГИБДД-кӧд ӧтув.