Транспорт тэчас сӧвмӧдӧм йылысь сёрнитісны Коми Республикаса Каналан Сӧветлӧн депутатъяс Сьӧмкуд, вот да экономическӧй политика комитетлӧн сӧвещание вылын. Мероприятиеыс муніс вӧльгым тӧлысь 11 лунӧ «2015 во вылӧ да 2016 да 2017 воясся планӧвӧй кадколаст вылӧ республиканскӧй сьӧмкуд йылысь» оланпас бала видлалан мероприятиеяслӧн план серти.

Ставнас 2015-2017 вояс вылӧ уджтаслы урчитӧма 13,8 млрд шайт, на пиын республиканскӧй сьӧмкудйысь 11,6 млрд шайт. Канму уджтасса медшӧр мероприятиеяссӧ  збыльмӧдӧны КР промышленносьт да транспорт министерство да КР туй агентство.

Туй ведомствоса юрнуӧдысь Эдуард Слабиков юӧртіс депутатъяслы мунан воын туйяс да посъяс дзоньталӧм да стрӧитӧм йылысь. Шуам, капитальнӧя дзоньталісны дінмуса туйяслысь 101 км да меставывса туйяслысь 14,4 км, 6 пос; стрӧитісны (выльмӧдісны) дінмуса туйяслысь 22 км да меставывса туйяслысь 8 км, стрӧитісны 2 пос да выльмӧдісны 7 пу пос.

Локтан куим воӧн кӧсйӧны дзоньтавны пӧшти 126 км туй да 5 пос. Тайӧ Сыктывкар-Мылдін, Ванвисдін-Яренск, Сыктывкар-Ухта, Кӧрткерӧс-Мордін-Лопыдін, Усвавом-Усинск туйныръяс.

Парламентарийяс юасисны, кор помаласны стрӧитны Мылдінӧ туй. Э. Слабиков пасйис, мый кӧсйӧны помавны 2018 воын. Сьӧмкуд, вот да экономическӧй политика комитетӧн веськӧдлысь Иван Медведев содтіс, мый колӧ вӧчны 38 км. «Депутатъяс корӧм серти стрӧитны заводитісны медся лёк туй участоксянь», – пасйис сійӧ.

Канму уджтасса мероприятиеяс йылысь, кутшӧмъяс серти могмӧдӧны кӧрт туйса, ва да сынӧд транспортӧн, висьтасис КР промышленносьт да транспорт кузя министр Андрей Самоделкин. Сідз, 2015-2017 воясын водзӧ кутасны отсавны социальнӧй тӧдчанлуна пассажирскӧй нуӧм-вайӧмъяслы, вагонъяс выльмӧдӧмлы. Ва транспорт бурмӧдӧм могысь кӧсйӧны ньӧбны паромъяс 5 муниципалитетлы, пасйӧмны юяс вылын судоходнӧй серпас кузя мероприятиеяс.

Каналан Сӧветлӧн депутатъясӧс ышӧдісны сынӧдті нуан-ваян планъяс. А. Самоделкин серти, водзӧ кутасны бурмӧдны дінмупытшкӧсса вез этша йӧза авиарейсъяс чинтӧмӧн да медся популярнӧй туйясті содтӧд рейсъяс содтӧмӧн. Сёрниыс мунӧ и дінмукостса авиа йитӧд йылысь. Сідз, кӧсйӧны восьтыны авиарейсъяс Сыктывкарсянь Салехардӧ, Уфаӧ, Вологдаӧ, Кировӧ, Тюменьӧ, Самараӧ да могмӧдны найӧс сьӧмӧн федеральнӧй сьӧмкудйысь.