2014-2015 воясын Коми Республикаын уна патераа керкаяс капитальнӧя дзоньталӧм вылӧ видзасны республиканскӧй да меставывса сьӧмкудъясысь, а сідзжӧ ЖКХ реформируйтан фондысь 210 миллион шайт. Та кындзи, Фонд урчитіс дінмулы 2015-2016 воясын дзоньталӧм вылӧ  31 миллион шайт мында лимит. Нӧшта дзоньталӧм вылӧ видзасны сьӧм, кутшӧмӧс чукӧртасны оланін ас киын кутысьяслысь.

Та йылысь юӧртісны «Коми Республика мутасын меститчӧм уна патераа керкаясын ӧтув эмбур капитальнӧя дзоньталӧм йылысь» Коми Республикаса 2013 вося лӧддза-номъя тӧлысь 57-РЗ №-а оланпас збыльмӧдан ног йылысь» темаа семинар дырйи. Видеоконференцияыс муніс ӧшым тӧлысь 9 лунӧ Республикаса сӧветъясӧн юрнуӧдысьяслӧн сӧветса удж серти. Сэні участвуйтісны КР Каналан Сӧветлӧн да дінмуын муниципальнӧй юкӧнъясса сӧветъяслӧн депутатъяс, олӧмӧ пӧртысь власьт органъясӧс, муниципалитетъясса администрацияясӧс, веськӧдлан компанияясӧс петкӧдлысьяс.

Паныдасьлӧмсӧ восьтіс Коми Республикаса Каналан Сӧветӧн Веськӧдлысьӧс вежысь, КР сӧветъясӧн юрнуӧдысьяслӧн сӧветӧн веськӧдлысь Игорь Ковзель. Сійӧ пасйис, мый оланін оланпастэчаслӧн корӧмъясӧ кутчысьӧм могысь республикаын талун лӧсьӧдісны став колана инӧда база, а 2014 вося йирым тӧлыссянь ас киын кутысьяслы быть колӧ мынтыны капремонт вылӧ сьӧм. «Такӧд йитӧдын депутатъяс водзын сулалӧ тӧдчана мог – та серти гӧгӧрвоӧдны олысьясӧс. Колӧ пасйыны, мый тӧдчанаторйӧн лоӧ капитальнӧя дзоньталӧмӧ быд ас киын эмбур кутысьлӧн пырӧдчӧм. Ӧд кутасны кӧ мынтысьны капремонтысь, сэки и керкаяссӧ кутасны дзоньтавны,мӧд петан туй абу», –  тӧдчӧдіс Игорь Ковзель.

Кыдзи пасйис КР архитектура да стрӧитчӧм кузя министрӧс вежысь Александр Лучшев, профильнӧй ведомство да уна патераа керкаяс капитальнӧя дзоньталӧм кузя дінмуса фонд нуӧдӧны консультацияяс да  семинаръяс, сы лыдын паныдасьлӧны эмбур ас киын кутысьяскӧд да веськӧдлан организацияяскӧд, муниципальнӧй юкӧнъяслӧн сӧветъяскӧд. Но юасьӧмъяс серти, капремонт нуӧданног да сьӧмӧн могмӧданног йылысь юӧрӧн олысьяс тӧдмасьӧны СМИ-ын да могмӧдан организацияясын. А капремонт кузя дінмуса уджтас йылысь тӧдӧны юасьӧмъяс лыдысь сӧмын 30 прӧчент. Такӧд йитӧдын Каналан Сӧветлӧн депутатъяс корисны меставывса власьтӧс зільджыка нуӧдны гӧгӧрвоадан удж.

Муниципалитетъясӧс петкӧдлысьяс корисны лӧсьӧдны йӧзлы гӧгӧрвоадан удж нуӧдӧмлысь ӧтувъя вӧзйӧмъяс, сетны налы содтӧд  методическӧй материалъяс да содтӧд паныдасьлыны.

Нӧшта ӧти мытшӧд кыпӧдіс «Уна патераа керкаяс капитальнӧя дзоньталӧм кузя дінмуса фонд» КР некоммерческӧй организацияӧн юрнуӧдысь Анна Воробьева – муниципалитетъяс сетӧны оланін фонд кузя важмӧм либӧ абу тырвыйӧ юӧр. Та вӧсна дінмуса да МЮ капремонт кузя уджтасъяссӧ колӧ стӧчмӧдны. А. Воробьева  нӧшта корис отсӧг депутатъяссянь дінмуса операторлы дон босьтӧг сетны юӧръяс, кутшӧмъяс эмӧсь Вӧрзьӧдны позьтӧм эмбур вылӧ да сыкӧд сделкаяс вылӧ инӧдъяслӧн ӧтувъя канму реестрын. Талун татшӧм юӧрысь операторлы ковмис эськӧ мынтыны 12 миллион шайт.  И. Ковзель серти, Каналан Сӧветлӧн сессияса локтан чукӧртчӧм вылын кӧсйӧны ошкыны Челябинск обласьтса Оланпаспыртан Собраниелысь  лӧсялана оланпас пыртан вӧзйӧм. «Оланпас баласӧ ошкисны нин Алтайским крайса Оланпаспыртан Собрание да  Татарстан Республикаса Каналан Сӧвет, ми сідзжӧ лыддям, мый тайӧ вежсьӧмъясыс зэв коланаӧсь»,  – тӧдчӧдіс И. Ковзель.

Семинар дырйи КР минархстройӧс да дінмуса операторӧс петкӧдлысьяс вочавидзисны каръясысь да районъясысь воӧм юалӧмъяс вылӧ. Шуам, пасйисны, мый капремонтысь мынтысьӧмсӧ кутасны инфляция серти индексируйтны.

Некымын муниципалитет висьталісны, мый банкъяс да «Россияса пошта» юкӧнъяс босьтӧны капремонт вылӧ мынтысьӧмъясысь ыджыд комиссия. Та кындзи, абу быд сиктын тайӧ организацияяслӧн юкӧнъясыс.  Сыктывкарса студияын чукӧртчысьяс сӧгласитчисны тайӧ мытшӧдкӧд. Сьӧмкуд, вот да экономическӧй политика комитетӧн веськӧдлысьӧс вежысь Иван Медведев вӧзйис  локтан кадӧ нуӧдны комитетын тайӧ юалӧм кузя  уджалан сӧвещание.