Коми Республикаса Каналан Сӧветӧн Веськӧдлысьӧс Медводдза вежысь Валерий Марков да дінмуса парламентлӧн депутатъяс участвуйтісны  Мӧд юридическӧй лыддьысьӧмъяслӧн пленарнӧй заседаниеын (Ставроссияса наука конференция), кутшӧмӧс вӧлі сиӧма Император Александр II ыджыд реформаяслы. Сійӧ мунӧ Сыктывкарын ӧшым тӧлысся 4-5 лунъясӧ.

Медшӧр котыртысьыс Сыктывкарса канму университет, кодлы отсаліс Коми Республикаса  Веськӧдлан котыр, Коми Республикаса Каналан Сӧвет да Россия Федерацияса Каналан Думалӧн депутатъяс.

Валерий Марков чолӧмаліс конференцияса гӧсьтъясӧс да участникъясӧс да пасйис, мый сё ветымын во сайын Александр II реформаяс ышӧдӧны оз сӧмын историкъясӧс. «Ми аддзам, мый Александрлӧн мӧвпъяс, гырысь вежсьӧмъяс йитчӧны талунъя олӧмкӧд. Талунъя Россияын уна лоӧмторлӧн подулыс тайӧ реформаяс сайын», - пасйис вице-спикер.

Валерий Марков серти, бӧръя воясын оланпас пыртан уджлӧн, сы лыдын Коми Республикаса каналан Сӧветлӧн,  аслыспӧлӧслуныс сыын, мый кутісны ёнджыка дасьтыны да вынсьӧдны инӧда актъяс, кутшӧмъяс збыльмӧдӧны Президентса Посланиеясын пасйӧм верктуй могъяс. А сідзжӧ могъяс, кутшӧмъяс зумыда сӧвмӧдӧны республика, бурмӧдӧны йӧзлысь олӧмсӧ.

Сёрни помас Коми Каналан Сӧветӧн Веськӧдлысьӧс Медводдза вежысь чолӧмаліс ставӧс кольӧм Юрист лунӧн да сиис ышӧдана, подула сёрни да бур удж.