Коми Республикаса Каналан Сӧветын Оланпастэчас да меставывса асвеськӧдлӧм да социальнӧй политика комитетъяслӧн ӧтувъя чукӧртчӧм вылын видлалісны тыр арлыдтӧмъяслысь инӧдъяс да оланпас кӧсйӧмъяс дорйӧм. Помканас лоис Надя Касевалӧн делӧ, коді кувсис мамыслӧн мусук киясысь. Парламентарийяс кындзи заседаниеын участвуйтісны Коми Республикаын МВД-ӧс петкӧдлысьяс, КР Юралысь бердын кагалысь инӧдъяс дорйысь, КР общественнӧй палатаӧ пырысьяс, КР удж да социальнӧя доръян министерствоӧс, КР прокуратураӧс, КР-ын РФ следственнӧй комитетӧс петкӧдлысьяс.

Кыдзи пасйис мероприятие восьтігӧн Оланпастэчас да меставывса асвеськӧдлӧм комитетӧн веськӧдлысь Владимир Косов, бӧръя кадӧ ыджыд мытшӧдӧн лоис челядьӧс нӧйтӧм.

«Тайӧ мытшӧдыс абу сӧмын торъя мортлӧн либӧ аскотырлӧн, а ставнас обществолӧн. Жаль, мый ми тшӧкыда кылам чорыда вӧдитчӧм йылысь да талун чукӧртчим, медым гӧгӧрвоны, кутшӧм мераяс колӧ примитны, торйӧн нин оланпас боксянь да кыдзи бурмӧдны челядьлысь олӧм», – тӧдчӧдіс депутат.

Коми Республикаса Каналан Сӧветӧн Веськӧдлысь Игорь Ковзель серти, татшӧм лёк лоӧмторъясын мыжаыс абу сӧмын морт, но и ведомствояс костын ӧтувъя уджын ыджыд мытшӧдъяс. «Видзӧдан да, эм став колана нормативнӧй инӧда подув, вынсьӧдӧмаӧсь оланпасъяс, тшӧктӧдъяс, быд  ведомстволӧн эм пытшкӧсса тшӧктӧмъяс. Но мыйла кӧ тайӧ сьӧкыд бюрократическӧй механизмыс тырвыйӧ оз уджав. Каналан Сӧветлӧн комитетъяс вӧчисны анализ тайӧ юкӧнын нормативнӧй подувлысь да ми талун нин аддзам федеральнӧй оланпастэчасын тырмытӧмторъяс. Ми дасьӧсь примитны ассьыным став вӧзйӧмсӧ, сэсся ӧтув дасьтыны колана стӧчмӧдӧмъяс да ыстыны Каналан Думалы», - пасйис Игорь Ковзель.

КР-ын пытшкӧс делӧяс министерствоӧн сетӧм юӧр серти, вонас  республикаын пасйӧны челядьӧс мырдӧналана кӧкъямыссёысь унджык мыж вӧчӧм, унджыкыс на пиын - нӧйтӧм. Заседаниеса участникъяс лыддьӧны, мый на пиысь унаторйыс вермис не лоны, профильса ведомствояслӧн специалистъяс кӧ кывкутӧмӧн уджалісны.

Заседаниеса участникъяс лыддьӧны, мый колӧ выльмӧдны челядьӧс доръян да найӧс чорыда видзӧм бӧрся видзӧдан систем. Быд специалистлы оз позь формальнӧя матыстчыны торъя кагалӧҥ да аскотырлӧн мытшӧдъяс дорӧ, колӧ лӧсьӧдны ведомствояс да власьт органъяс костын окталуна ӧтувъя удж.

Тӧдчана воськовӧн лоас талунъя оланпастэчас бурмӧдӧм. КР удж да социальнӧя доръян министр Илья Семяшкин серти, ведомство вӧчис кывкӧртӧдъяс нывка кувсьӧм кузя да аддзис инӧд боксянь тырмытӧмторъяс, кутшӧмъясӧс колӧ бырӧдны. Сідз колӧ стӧча пасйыны, кор позьӧ босьтны кагаӧс аскотырысь, урчитны тайӧ процедуралысь вӧчанног.

Челядькӧд чорыда вӧдитчӧм кузя мытшӧд разьӧмын торъя пайыс юӧртӧм да пропаганда сайын. Республикаса олысьяс колӧ тӧдны, мый вӧчны татшӧм лоӧмтор дырйи да кытчӧ шыӧдчыны отсӧгла. Та вӧсна колӧ паськӧдны опека да попечительство органъяслысь, тыр арлыдтӧмъяс кузя комиссияяслысь, Кагалысь инӧдъяс дорйысьлысь, участковӧйяслысь телепонъяс. Та могысь колӧ зіля вӧдитчыны социальнӧй реклама. 

Йӧзӧн бӧрйӧмаяс сетісны ӧткымын ёсь юалӧм республиканскӧй прокуратураӧс петкӧдлысьяслы. Депутатъяс серти, дӧзьӧритан органъяслӧн специалистъяс шыӧдчисны Надя Касевалӧн делӧ дорӧ ёна сёр, мыж вӧчӧм бӧрын нин. Эжваса прокуратураса петкӧдлысьяс, кодъяслы коліс дӧзьӧритны тыр арлыдтӧмъяслысь инӧдъяс дорйӧм бӧрся, кутісны видзӧдны сӧмын мыж вӧчӧм бӧрын, кӧть кагаӧс чорыда видзӧм йылысь медводдзаысь юӧртлісны нин во джын сайын.

Такӧд йитӧдын Каналан Сӧветӧн Веськӧдлысь Игорь Ковзель вӧзйис пыртны прокуратураса уджалысьясӧс челядьӧс чорыда видзӧм серти мытшӧдъяс кузя ведомствояскостса ӧтувъя уджӧ, а та могысь колӧ лӧсьӧдны лӧсялана акт, кутшӧм эськӧ урчитіс ӧлӧдан да дӧзьӧритан органъяслысь вӧчӧмторъяс. Республикаса прокурорӧс медводдза вежысь Павел Морозов сутіс та дор.

Заседание кывкӧрталігӧн Коми Республикаса Каналан Сӧветӧн Веськӧдлысьӧс вежысь Александр Макаренко шыӧдчис Игорь Ковзель дорӧ сетны поручение парламентса Комитетъяслы мукӧд ведомствокӧд ӧтув видлавны федеральнӧй оланпастэчасӧ стӧчмӧдӧмъяс пыртӧм йылысь юалӧм.

Шуам йӧзӧн бӧрйӧмаяс вӧзйӧны сетны быдтан уджмогъяс оз сӧмын бать-мамлы, но и налы, кодъяс олӧны кагакӧд либӧ кодъяс тӧдчана пай пуктӧны кага олӧмӧ. Та кындзи, депутатъяс лыддьӧны урчитны, мый бать-мам оз вермыны петкӧдлыны ёрдын кагалысь кӧсйӧмъяссӧ (лоны налӧн оланпас серти петкӧдлысьясӧн) сэк, кор найӧ увтыртӧны, чорыда видзӧны, нӧйтӧны либӧ нартитӧны челядьӧс.

«Дерт, тайӧ зэв кывкутана удж да ӧти лунӧн он вӧч. Но тайӧ уджӧ колӧ дзик пыр босьтчыны. Мӧд ногӧн татшӧм лоӧмторйыс кутас тшӧкыда артмыны. Миянлы колӧ вӧчны ставсӧ, медым видзны челядьӧс лёкторйысь и  тайӧс ми вермам вӧчныы», – тӧдчӧдіс Александр Макаренко.

Тайӧ да мукӧд вӧзйӧм пыртасны кык комитетлӧн решениеӧ, кутшӧмлысь баласӧ йӧзӧн бӧрйӧмаяс ӧтсӧгласӧн ошкисны.