Коми Республикаса Каналан Сӧветын VIII сессияса  IV заседаниелӧн сёрнитанторйысь ӧтдор петкӧдчисны кансям ютыръясӧс петкӧдлысьяс, кутшӧмъяс абуӧсь КР V бӧрйӧм Каналан Сӧветын, «Меставывса асвеськӧдлан ӧтйӧза институтъяс сӧвмӧдӧмын кансям ютыръяслӧн пай» юалӧм серти.

Абу парламентса кызь кӧкъямыс кансям ютыръяс пиысь висьтасисны квайтӧн. Тайӧ "ПАТРИОТЫ РОССИИ" кансям ютырлӧн Коми республиканскӧй дінмуса юкӧнлӧн комитетӧн веськӧдлысь Андрей Пятков, "Республиканская партия России – Партия народной свободы" кансям ютырлӧн Коми дінмуса юкӧнӧн веськӧдлысь Леонид Зильберг, "Российский общенародный союз" кансям ютырлӧн Коми Республикаын дінмуса юкӧнӧн веськӧдлысь Николай Збаражский, "ПРАВОЕ ДЕЛО" Ставроссияса кансям ютырлӧн Коми Республикаын дінмуса юкӧнӧн веськодлысь Евгений Вологин, "ПАРТИЯ ПРОГРЕССА" кансям ютырса Коми Республикаын дінмуса юкӧнӧн веськӧдлысь Григорий Каблис да "РОДИНА" Ставроссияса кансям ютырлӧн Коми Республикаын дінмуса юкӧнлӧн советӧ пырысь Александр Рассохин.

Кансям ютыръясӧс петкӧдлысьяс вӧзйисны местаяс вылын уджавны ӧтйӧза иннститутъяслы да бурджыка лӧсьӧдны муниципальнӧй веськӧдлӧм. Сідз, Андрей Пятков пасйис, мый «Патриоты России» ютыр зіля пырӧдчис Сыктывдін районса Зеленеч сиктын ТОС лӧсьӧдӧмӧ да отсаліс овмӧдчӧминлы разьны мытшӧдъяс. Нӧшта сійӧ шуис, мый водзӧ вылӧ ТОС-яс отсаласны могмӧдны сиктса овмӧдчӧминъяслысь безопасносьт. Ютырын водзмӧстчысь нӧшта пасйис кадръяс кузя юалӧмъяс, рака тӧлысьын ютырӧс петкӧдлысьяс кӧсйӧны лӧсьӧдны да ыстыны дінмуса Веськӧдлан котырлы да Каналан Сӧветлы ветымын веськӧдлысьлысь лыддьӧг, кутшӧм подув вылын позьӧ выльмӧдны власьт.

Муниципалитетъясын кадръясӧс вежӧм йылысь сёрнитіс и Евгений Вологин. Та кындзи, дінмуын «Правое дело»-ын водзмӧстчысь казьтыштіс земствояслысь удж да вӧзйис пыртны налысь бур уджсӧ социальнӧй  инфраструктура сӧвмӧдігӧн.

Григорий Каблис пасйис муниципалитетъяслы некымын ёсь юалӧм. Сы серти, коло выльысь видлавны контракта система йылысь 44 №-а  федеральнӧй оланпас, торйӧн нин ичӧт сиктъясын сыӧн вӧдитчигӧн. «Партия прогресса» петкӧдлысь лыддьӧ, мый коло вӧчны став, медым республикаысь йӧзыс эз мунны, сы лыдын сетны гражданалы ас керка стрӧитӧм вылӧ му участокъяс.

Мукӧд ютырӧс петкӧдлысьяс сёрнитісны республикаын кансям ютыръяслӧн пай йылысь.

Коми Республикаса Каналан Сӧветӧн Веськӧдлысь Игорь Ковзель пасйис, мый ютырса веськӧдлысьяс вӧзйисны стӧч да бур вӧзйӧмъяс, кутшӧмъясӧс ковмас видлавны оланпас пыртан власьт органын.

«Кӧсъя тӧдчӧдны, мый Каналан Сӧвет дась ӧтув уджавны став ӧтйӧза  котыръяскӧд, некоммерческӧй ӧтувъяскӧд, кансям ютыръяскӧд. Ми век сёрнитам та йылысь. Но, во чӧж абу парламентса ютыръяс воча оз мунны. Зэв жаль, ӧд ми вермим ӧтув унатор вӧчны висьталӧм юалӧмъяс кузя да миян уджъёртъяс эськӧ талун висьталісны шедӧдӧмтор да тырмытӧмтор йылысь. Ті кӧ висьталанныд, мый эмӧсь мытшӧдъяс, локтӧй миян дорӧ да вай кутам ӧтув разьны найӧс. Урчитӧм темаыс абу кокни. Меставывса асвеськӧдлан органъяскӧд, муниципалитетъяскӧд удж медся тӧдчана туйвизь, ӧд канму артмӧ карса да районса сӧветъяссянь. Та вӧсна ютыръяслы уджсӧ колӧ панны оз Москвасянь, а ылі сикт-грездсянь».