Ӧшым тӧлысь 18 лунӧ Коми Республикаса Каналан Сӧветын муніс кӧкъямысӧд сессиялӧн медбӧръя, нёльӧд, заседание.

Депутатъяс видлалісны 19 юалӧм. Парламентарийяс пыртісны вежсьӧмъяс 2014 во да 2015 да 2016 воясся планӧвӧй кадколаст вылӧ республиканскӧй сьӧмкуд йылысь, Коми Республикаын сьӧмкудса тэчас да сьӧмкудса процесс йылысь, 2014 во да 2015 да 2016 воясся планӧвӧй кадколаст вылӧ мутасса ФОМС-лӧн сьӧмкуд йылысь, меставывса асвеськӧдлан органъяслы бать-мамтӧм челядьӧс олан жыръясӧн могмӧдӧм кузя канму уджмогъяс сетӧм йылысь, а сідзжӧ торъя категорияа гражданаӧс оланінӧн могмӧдӧм кузя социальнӧй отсӧг мераяс сетӧм йылысь республиканскӧй оланпасъясӧ. Вынсьӧдісны стӧчмӧдӧмъяс  административнӧй кывкутӧм йылысь, республикаын мортӧс ёнмӧдӧмын да спортын ӧткымын юалӧм йылысь оланпасъясӧ да мукӧдтор.

Каналан Сӧветлӧн шуӧмӧн ошкисны «Вӧрзьӧдны позьтӧм эмбур вылӧ да сыкӧд сделкаяс вылӧ инӧдъяс канмусянь пасйӧм йылысь» Федеральнӧй оланпасса 7 да 8 статьяясӧ вежсьӧмъяс пыртӧм йылысь» федеральнӧй оланпас бала, кутшӧм серти дон босьттӧг кутасны сетны юӧръяс Вӧрзьӧдны позьтӧм эмбур вылӧ да сыкӧд сделкаяс вылӧ инӧдъяслӧн ӧтувъя канму реестрысь  дінмуса операторлы, коді капитальнӧя дзоньталӧ уна патераа керкаяс. Оланпас баласӧ вӧзйис Челябинск обласьтса Оланпас пыртан Собраниеӧн.

Заседание вылын нӧшта видлалісны кадръяс кузя юалӧмъяс. Вӧр-ва озырлун, вӧр-ваӧн вӧдитчан да экология комитетӧн веськӧдлысьӧн индісны Сергей Артеевӧс. Та вӧсна сійӧс вештісны Социальнӧй политика комитетысь.

Абу парламентса кансям ютыръясӧс петкӧдлысьяс сёрнитісны «Меставывса асвеськӧдлан ӧтйӧза институтъяс сӧвмӧдӧмын кансям ютыръяслӧн пай» юалӧм кузя.

Та кындзи, заседание водзын сенатор Валерий Жилин сетіс РФ ФС Федерация Сӧветлысь почёт грамота Каналан Сӧветса Аппаратлӧн Социальнӧй политика комитетлысь удж могмӧдан юкӧнса начальник Елена Соломинцевалы, а КР Веськӧдлан котырӧн Веськӧдлысь Владимир Тукмаков сетіс Коми Республикаса Юралысьлысь аттьӧалӧм котырса юкӧнлӧн начальникӧс вежысь Галина Латкиналы.