Коми Республикаса канму символ чукӧр

 КОМИ РЕСПУБЛИКАСА ОЛАНПАС

 

КОМИ РЕСПУБЛИКАСА КАНМУ КАНПАС ЙЫЛЫСЬ

 

(1997.12.26  50-РЗ №-а; 2000.10.17  52-РЗ №-а; 2001.04.10  16-РЗ №-а; 2003.05.12  29-РЗ №-а; 2004.04.07  13-РЗ №-а; 2008.04.30  25-РЗ №-а; 2008. 09.29 95-РЗ №-а; 2010.02.17 11-РЗ №-а;  2010.12.20 152-РЗ №-а; 2014.04.28 22-РЗ №-а; 2014.09.26 110-РЗ №-а Коми Республикаса оланпасъясӧн пыртӧм вежсьӧмъясӧн)

 

Россия Федерацияса оланпастэчас да Коми Республикаса Оланподув серти тайӧ Оланпасӧн лӧсьӧдсьӧ Коми Республикалӧн канму канпас, сылӧн серпас да сыӧн официальнӧя вӧдитчанног.

 

1 статья. Коми Республикалӧн канму канпас лоӧ Коми Республикалӧн официальнӧй канму символӧн.

 

2 статья. Коми Республикалӧн канму канпас – пермскӧй зверинӧй стиль серти серпасалӧм веськыда видзӧдысь зарни варыш, коді гӧрд геральдическӧй пӧв вылын; лэбач морӧсас – аньлӧн чужӧмбан, кодӧс кытшалӧ квайт йӧра юр (сюръястӧг), быд боксянь куимӧн; ставсӧ серпасалӧма зарниӧн.

 

3 статья. Коми Республикаса канму канпассӧ позьӧ вӧчны сьӧда-еджыда рӧмъясӧн, а сідзжӧ сійӧс позьӧ вӧчны геральдическӧй пӧвтӧг ӧти сикас зарни рӧмӧн.

 

4 статья. Коми Республикалысь канму канпас серпасалӧны:

1) Коми Республикаса оланпасъяс, Коми Республикаса Каналан Сӧветлӧн шуӧмъяс, Коми Республикаса Юралысьлӧн индӧдъяс да тшӧктӧмъяс, Коми Республикаса Веськӧдлан котырлӧн шуӧмъяс да тшӧктӧмъяс, Коми Республикаса министерствояслӧн да олӧмӧ пӧртысь власьт мукӧд органлӧн нормативнӧй инӧда актъяс, Коми Республикаса Оланподув Ёрдлӧн, Коми Республикаын мирӧвӧй ёрдысьяслӧн помшуӧмъяс, Коми Республикаса видзӧдан-арталан палаталӧн представлениеяс да предписаниеяс, Коми Республикаса бӧрйысян комиссиялӧн помшуӧмъяс бланокъяс вылын;

2) Коми Республикаса Каналан Сӧветлӧн, Коми Республикалӧн Каналан Сӧветса Веськӧдлысьлӧн, Коми Республикалӧн Каналан Сӧветса Веськӧдлысьӧс вежысьяслӧн, Коми Республикаса Юралысьлӧн, Коми Республикаса Юралысьӧс вежысьяслӧн, Коми Республикаса Веськӧдлан котырлӧн, Коми Республикалӧн Веськӧдлан котырса Веськӧдлысьлӧн, Коми Республикаса Оланподув Ёрдлӧн, Коми Республикаын морт инӧдъяс торъя дорйысьлӧн, Коми Республикаын асшӧр уджалысьяслысь инӧдъяс торъя дорйысьлӧн, Коми Республикаса Юралысь бердын кага инӧдъяс торъя дорйысьлӧн, Коми Республикаса видзӧдан-арталан палаталӧн, Коми Республикаса бӧрйысян комиссиялӧн, Коми Республикаын мирӧвӧй ёрдысьяслӧн, Коми Республикаса министерствояслӧн да олӧмӧ пӧртысь власьт мукӧд органлӧн, Коми Республикаса канму органъяслӧн, Коми Республикаса канму учреждениеяслӧн, Коми Республикаса канму ӧтувъя предприятиеяслӧн бланокъяс вылын;

3) Коми Республикаса Каналан Сӧветлӧн, Коми Республикаса Юралысьлӧн, Коми Республикаса Веськӧдлан котырлӧн, Коми Республикаса Оланподув Ёрдлӧн, Коми Республикаын морт инӧдъяс торъя дорйысьлӧн, Коми Республикаса видзӧдан-арталан палаталӧн, Коми Республикаса бӧрйысян комиссиялӧн, Коми Республикаса министерствояслӧн да олӧмӧ пӧртысь власьт мукӧд органлӧн, Коми Республикаса канму органъяслӧн, Россия Федерацияын Коми Республикаӧс петкӧдланінъяслӧн, Россия Федерацияса субъектъясын Коми Республикаӧс петкӧдланінъяслӧн, суйӧрсайса канму мутасын Коми Республикаӧс петкӧдланінъяслӧн, Коми Республикаын меставывса асвеськӧдлан органъяслӧн (водзӧ — меставывса асвеськӧдлан органъяс), организацияяслӧн налӧн котыртан-инӧда форма вылӧ видзӧдтӧг канпаса печатьяс вылын;

4) Коми Республикаса Каналан Сӧветлӧн, Коми Республикаса Юралысьлӧн, Коми Республикаса Веськӧдлан котырлӧн керка банын, Коми Республикаса  Оланподув Ёрдлӧн, Коми Республикаын морт инӧдъяс торъя дорйысьлӧн, Коми Республикаын асшӧр уджалысьяслысь инӧдъяс торъя дорйысьлӧн, Коми Республикаса Юралысь бердын кага инӧдъяс торъя дорйысьлӧн, Коми Республикаса видзӧдан-арталан палаталӧн, Коми Республикаса бӧрйысян комиссиялӧн, Коми Республикаын мирӧвӧй ёрдысьяслӧн, Коми Республикаса министерствояслӧн да олӧмӧ пӧртысь власьт мукӧд органлӧн, Коми Республикаса канму органъяслӧн, Россия Федерацияын Коми Республикаӧс петкӧдланінъяслӧн, Россия Федерацияса субъектъясын Коми Республикаӧс петкӧдланінъяслӧн, суйӧрсайса канму мутасын Коми Республикаӧс петкӧдланінъяслӧн, меставывса асвеськӧдлан органъяслӧн вывескаяс вылын;

5) Коми Республикаса Юралысьлӧн, Коми Республикалӧн Каналан Сӧветса Веськӧдлысьлӧн, Коми Республикалӧн Веськӧдлан котырса Веськӧдлысьлӧн; Коми Республикалӧн Оланподув Ёрдса Веськӧдлысьлӧн, Коми Республикалӧн видзӧдан-арталан палатаса веськӧдлысьлӧн, Коми Республикалӧн бӧрйысян комиссияса веськӧдлысьлӧн, Россия Федерацияын Коми Республикаӧс петкӧдлысьяслӧн, Россия Федерацияса субъектъясын Коми Республикаӧс петкӧдлысьяслӧн, суйӧрсайса канму мутасын Коми Республикаӧс петкӧдлысьяслӧн уджалан жыръясын, Коми Республикалӧн Каналан Сӧветса, Коми Республикалӧн Веськӧдлан котырса Веськӧдлысьлӧн, Коми Республикаса Веськӧдлан котырлӧн да меставывса асвеськӧдлан бӧрйӧм органъясса, Коми Республикаса бӧрйысян комиссияса заседаниеяс нуӧдан залъясын, Коми Республикаса Оланподув Ёрдлӧн, Коми Республикаын мирӧвӧй ёрдысьяслӧн ёрд заседание нуӧдан залъясын, чужӧм кагаӧс да выль гозъяӧс кыпыда пасъян жыръясын;

6) Коми Республикалӧн Каналан Сӧветса депутатъяслӧн эскӧданпасъясын, служебнӧй эскӧданпасъясын, кутшӧмъясӧс сетӧны Коми Республикаса канму власьт органъяс, Коми Республикаса канму органъяс. Коми Республикалысь канму канпас позьӧ серпасавны Коми Республикаса канму чинын уджалысь чина йӧзлӧн да бӧръян муниципальнӧй чина йӧзлӧн торъя пас вылын;

7) Коми Республикаса Каналан Сӧветлӧн, Коми Республикаса Юралысьлӧн, Коми Республикаса олӧмӧ пӧртысь власьт органъяслӧн официальнӧй изданиеяс вылын;

8) магистральнӧй туйяс вылын Коми Республикалысь мудор индысь пасъясын;

9) Коми Республикаса канму наградаяс, Коми Республикаса мукӧд награда, Коми Республикаын ошкӧмъяс вылын, мый индӧны «Коми Республикаын наградаяс да ошкӧмъяс йылысь» Коми Республикаса Оланпас серти, да на дорӧ эскӧданпасъясын, Коми Республикаса Веськӧдлан котырлӧн премияа лауреатъяслӧн дипломъясын да почёта пасъясын.

 

5 статья. Коми Республикалысь канму канпас вермӧны серпасавны:

1) Коми Республикаса Каналан Сӧветлӧн комитетъясса веськӧдлысьяслӧн, Коми Республикалӧн министерствоясса да олӧмӧ пӧртысь мукӧд органса юрнуӧдысьяслӧн, Коми Республикаса канму органъясса юрнуӧдысьяслӧн, Коми Республикаын морт инӧдъяс торъя дорйысьлӧн, Коми Республикаын асшӧр уджалысьяслысь инӧдъяс торъя дорйысьлӧн, Коми Республикаса Юралысь бердын кага инӧдъяс торъя дорйысьлӧн, меставывса асвеськӧдлан органъясса юрнуӧдысьяслӧн, Коми Республикаын федеральнӧй олӧмӧ пӧртысь власьт органъясса да налӧн мутас органъясса юрнуӧдысьяслӧн, Коми Республикалӧн Оланподув Ёрдса ёрдысьяслӧн, Коми Республикалӧн Медвылыс Ёрдса, Коми Республикалӧн арбитражнӧй ёрдса веськӧдлысьяслӧн, Коми Республикаса прокурорлӧн, районъясын федеральнӧй ёрдса веськӧдлысьяслӧн, федеральнӧй ёрдысьяслӧн, Коми Республикаын мирӧвӧй ёрдысьяслӧн, прокуроръяслӧн, Коми Республикалӧн канму власьт органъясса юрнуӧдысьясӧс вежысьяслӧн уджалан жыръясын, Коми Республикаын федеральнӧй ёрдъяслӧн ёрд заседаниеяс нуӧдан залъясын;

2) меставывса асвеськӧдлан органъясӧн примитӧм (лэдзӧм) нормативнӧй инӧда акт бланокъяс вылын;

3) меставывса асвеськӧдлан органъяслӧн мукӧд бланок вылын;

4) меставывса асвеськӧдлан органъяслӧн вывескаяс вылын, а сідзжӧ жыръясын, кӧні нуӧдӧны меставывса асвеськӧдлан органъяслысь заседаниеяс;

5) официальнӧй документъясын, кутшӧмъясӧс сетӧны меставывса асвеськӧдлан органъяс;

6) муниципальнӧй ӧтувъя предприятиеяслӧн да муниципальнӧй учреждениеяслӧн бланокъяс вылын;

7) Коми Республикаса Юралысьӧн, Коми Республикаса канму власьт органъясӧн ошкӧм либӧ котыртӧм официальнӧй да культурно-массӧвӧй мероприятиеяс, фестивальяс да конкурсъяс оформитан элементъяс вылын.

 

6 статья. Коми Республикаса Юралысьӧн вермас лоны  артыштӧма мукӧдтор, кӧні официальнӧя лоӧ серпасалӧма Коми Республикалысь канму канпас.

 

7 статья. Коми Республика мутасын муниципальнӧй юкӧнъяслӧн, ӧтйӧза ӧтувъяслӧн, организацияяслӧн налӧн котыртан-инӧда форма вылӧ видзӧдтӧг канпасъясыс (геральдика пасъясыс) оз вермыны лоны ӧткодьӧсь Коми Республикаса канму канпаскӧд.

Коми Республикаса канму канпас оз вермы лоны геральдика подулӧн муниципальнӧй юкӧнъяслӧн, ӧтйӧза ӧтувъяслӧн, организацияяслӧн налӧн котыртан-инӧда форма вылӧ видзӧдтӧг канпасъяслы (геральдика пасъяслы).

 

8 статья. Кор Коми Республикалысь канму канпас да мукӧд канпас петкӧдлӧма ӧтпырйӧ, найӧс индӧны тадзи, сулавны кӧ налы воча чужӧмӧн:

1) Коми Республикалӧн канму канпас да Россия Федерациялӧн канму канпас - веськыдладорас Коми Республикалӧн канму канпас;

2) Коми Республикалӧн канму канпас, Россия Федерациялӧн канму канпас да муниципальнӧй юкӧнлӧн либӧ ӧтйӧза ӧтувлӧн да организацияяслӧн налӧн котыртан-инӧда форма вылӧ видзӧдтӧг канпас (геральдика пас) - Россия Федерациялӧн канму канпассянь шуйгаладорас Коми Республикалӧн канму канпас;

3) Коми Республикалӧн канму канпас да муниципальнӧй юкӧнлӧн либӧ ӧтйӧза ӧтувлӧн да организацияяслӧн налӧн котыртан-инӧда форма вылӧ видзӧдтӧг канпас (геральдика пас) - шуйгаладорас Коми Республикалӧн канму канпас;

4) канпаслӧн (геральдика паслӧн) лыдыс абу чётнӧй (Россия Федерациялӧн канму канпастӧг) – шӧрас Коми Республикалӧн канму канпас;

5) канпаслӧн лыдыс чётнӧй (но кыкысь унджык) (Россия Федерациялӧн канму канпастӧг) – шӧрсяньыс шуйгаладорджык Коми Республикалӧн канму канпас.

Кор ӧтпырйӧ петкӧдлӧны Коми Республикалысь канму канпас, Россия Федерациялысь канму канпас да мукӧд канпас (геральдика пас), Коми Республикалӧн канму канпасыс Россия Федерациялӧн канму канпаскӧд мед вӧлі ыджданас ӧткодь, а муниципальнӧй юкӧнъяслӧн, ӧтйӧза ӧтувъяслӧн да организацияяслӧн налӧн котыртан-инӧда форма вылӧ видзӧдтӧг  канпасыс (геральдика пасыс) ыджданас оз вермы лоны ыджыдджык Коми Республикалӧн канму канпасысь. Коми Республикалӧн канму канпас петкӧдлыссьӧ Россия Федерациялӧн канму канпаскӧд ӧти тшупӧдын да оз вермы петкӧдлыссьыны мукӧд канпасысь (геральдика пасысь) улынджык.

Коми Республикаса канму канпассӧ ӧшӧдӧны сылӧн улысса юкӧнсянь джоджӧдз 150 сантиметрысь оз этшаджык вылнаын:

1) стенӧ — тайӧ Оланпаслӧн 4 статьяса 5 пунктын да 5 статьяса 1 пунктын индӧм йӧзлӧн уджалан жыръясын;

2) стенӧ — жыръясын, кӧні нуӧдӧны Коми Республикаса Каналан Сӧветлысь, Коми Республикаса Веськӧдлан котырлысь, Коми Республикаса бӧрйысян комиссиялысь, меставывса асвеськӧдлан органъяслысь заседаниеяс, Коми Республикаса Оланподув Ёрдлысь, Коми Республикаса федеральнӧй ёрдъяслысь, Коми Республикаын мирӧвӧй ёрдысьяслӧн заседаниеяс нуӧдан залъясын, а сідзжӧ чужӧм кагаӧс да выль гозъяӧс кыпыда пасъян жыръясын.

 

9 статья. Коми Республикалӧн канму канпасыс сылӧн ыджда вылӧ видзӧдтӧг мед вӧлі геральдика серти дзик сэтшӧм жӧ, кыдзи сетӧма  тайӧ Оланпасын вайӧдӧм серпасын.

Коми Республикаса канму канпас оз позь серпасавны Коми Республикаса канму дӧрапас вылӧ либӧ сылӧн серпас вылӧ, сыысь кындзи, кор серпасалӧны:

1) Коми Республикаса канму власьт органъяс;

2) полиграфическӧй, сувенирнӧй да мукӧд продукция вылын, кутшӧмъяс петкӧдлӧны Коми Республикалысь историческӧй, культурнӧй да мукӧд традиция да аслыспӧлӧслун;

3) Коми Республикаса сборнӧй командаяслӧн, спортивнӧй организацияяслӧн да спортсменъяслӧн, кодъяслы отсӧгсӧ сетӧны Коми Республикаса канму власьт органъяс, кӧлуй да спортивнӧй паськӧм вылын.

Оз позь серпасавны Коми Республикалысь канму канпас муниципальнӧй юкӧнъяслӧн, ӧтйӧза ӧтувъяслӧн, организацияяслӧн налӧн котыртан-инӧда форма вылӧ видзӧдтӧг дӧрапасъяс (налӧн серпасъяс) вылын.

 

10 статья. Канму органъясӧн, меставывса асвеськӧдлан органъяс, организацияяс налӧн котыртан-инӧда форма вылӧ видзӧдтӧг Коми Республикалӧн канму канпасӧн вӧдитчӧны наӧн урчитӧм пӧрадок серти тайӧ Оланпаслысь корӧмъяс тӧд вылӧ босьтӧмӧн.

 

11 статья. Коми Республикаса канму канпасӧн тайӧ Оланпас торкӧмӧн вӧдитчӧмысь, а сідзжӧ Коми Республикаса канму канпас пыдди пуктытӧмысь кыскӧны кывкутӧмӧ «Коми Республикаын административнӧй кывкутӧм йылысь» Коми Республикаса Оланпас серти.

 

Коми Республикалӧн Медвылыс Сӧветса Веськӧдлысь                                                                           Ю.СПИРИДОНОВ

 

Сыктывкар

1994 вося лӧддза-номъя тӧлысь 6 лун

XІІ-20/1 №

 

 «Коми Республикаса канму канпас йылысь» Коми Республикаса Оланпас дорӧ содтӧд — Коми Республикаса канму канпаслӧн серпас

КОМИ РЕСПУБЛИКАСА ОЛАНПАС

 

КОМИ РЕСПУБЛИКАЛÖН КАНМУ ДÖРАПАС ЙЫЛЫСЬ

 

(1997.12.26 47-РЗ №-а; 2000.10.17 50-РЗ №-а; 2001.04.10 17-РЗ №-а; 2003.05.12 28-РЗ №-а;2004.04.07 14-РЗ №-а; 2008.04.30 26-РЗ №-а; 2014.05.05 37-РЗ №-а КР-са оланпасъясӧн

пыртӧм вежсьӧмъяс)

 

Россия Федерацияса оланпастэчас да Коми Республикаса Оланподув серти тайӧ Оланпасӧн лӧсьӧдсьӧ Коми Республикалӧн канму дӧрапас, сылӧн серпас да сыӧн официальнӧя вӧдитчанног.

 

1 статья. Коми Республикалӧн канму дӧрапас лоӧ Коми Республикалӧн официальнӧй канму символӧн.

 

2 статья. Коми Республикалӧн канму дӧрапас – веськыд пельӧса дӧра, кодӧс кузьта ногнас юкӧма куим ӧтыджда визь вылӧ: выліас – лӧз, шӧрас – турунвиж да уліас – еджыд рӧма. Дӧрапаслӧн пасьтаыс кузьта серти – 2 : 3. Дӧрапассӧ вермасны вӧчны быд сикас дӧраысь.

 

3 статья. Коми Республикалӧн канму дӧрапас:

1) пыр сувтӧдсьӧ керкаяс вылӧ, кӧні меститчӧны:

Коми Республикаса Юралысь,

Коми Республикаса Каналан Сӧвет,

Коми Республикаса Веськӧдлан котыр,

Коми Республикаса Оланподув Ёрд,

Коми Республикаын морт инӧдъяс торъя дорйысь,

Коми Республикаын асшӧр уджалысьяслысь инӧдъяс торъя дорйысь,

Коми Республикаса Юралысь бердын кага инӧдъяс торъя дорйысь,

Коми Республикаса видзӧдан-арталан палата,

Коми Республикаын меставывса асвеськӧдлан органъяс (водзӧ - меставывса асвеськӧдлан органъяс);

2) сувтӧдсьӧ либӧ ӧшӧдсьӧ керкаяс вылӧ, кӧні нуӧдсьӧны Коми Республикаса Каналан Сӧветлӧн, Коми Республикаса Веськӧдлан котырлӧн, меставывса асвеськӧдлан бӧрйӧм органъяслӧн заседаниеяс, - заседание чӧж;

3) пыр сувтӧдсьӧ либӧ ӧшӧдсьӧ керкаяс вылӧ, кӧні меститчӧны:

Коми Республикаса министерствояс да олӧмӧ пӧртысь власьт мукӧд орган,

Россия Федерацияын Коми Республикаӧс петкӧдланінъяс, Россия Федерацияса субъектъясын Коми Республикаӧс петкӧдланінъяс,

Коми Республикаса бӧрйысян комиссия,

Коми Республикаын мирӧвӧй ёрдысьяс;

3-1) пыр ӧшӧдсьӧ общеобразовательнӧй организацияяслӧн керкаяс вылӧ эмбур сикасъяс вылӧ видзӧдтӧг либӧ пыр сувтӧдсьӧ налӧн мутас вылӧ;

4) вермас пыр сувтӧдсьыны либӧ ӧшӧдсьыны керкаяс вылӧ, кӧні меститчӧны федеральнӧй олӧмӧ пӧртысь власьт органъяс да Коми Республикаын федеральнӧй ёрдъяс;

5) сувтӧдсьӧ керкаяс вылӧ, кӧні меститчӧны суйӧрсайса канмуяс мутасын Коми Республикаӧс петкӧдланінъяс, войтыркостса инӧд нормаяс, дипломатическӧй протокол правилӧяс да воан странаса традицияяс серти.

 

4 статья. Коми Республикалӧн канму дӧрапас ӧшӧдсьӧ ӧтйӧза ӧтувъяслӧн да организацияяслӧн налӧн котыртан-инӧда форма вылӧ видзӧдтӧг керкаяс вылӧ, а сідзжӧ олан керкаяс вылӧ Россия Федерацияса канму праздник да Коми Республикаса канму праздник лунъясӧ. Коми Республикалӧн канму дӧрапас позьӧ ӧшӧдны тайӧ статьяын индӧм керкаяс вылӧ да мукӧд праздник да тӧдчана лунӧ.

 

5 статья. Коми Республикалӧн канму дӧрапас:

1) пыр сувтӧдсьӧ Коми Республикаса Каналан Сӧветлӧн, Коми Республикаса Веськӧдлан котырлӧн да меставывса асвеськӧдлан бӧрйӧм органъяслӧн, Коми Республикаса бӧрйысян комиссиялӧн заседание нуӧдан жыръясын, Коми Республикаса Оланподув Ёрдлӧн да Коми Республикаын мирӧвӧй ёрдысьяслӧн ёрд заседание нуӧдан жыръясын;

2) пыр сувтӧдсьӧ уджалан жыръясын:

Коми Республикаса Юралысьлӧн, Коми Республикалӧн Веськӧдлан котырса Веськӧдлысьлӧн да Коми Республикалӧн Каналан Сӧветса Веськӧдлысьлӧн, а сідзжӧ жыръясын, кӧні нуӧдсьӧны кыпыд мероприятиеяс (церемонияяс) сэтчӧ налӧн волӧмӧн,

Коми Республикалӧн Оланподув Ёрдса Веськӧдлысьлӧн да ёрдысьяслӧн,

Коми Республикаын мирӧвӧй ёрдысьяслӧн,

Коми Республикаын видзӧдан-арталан палатаса веськӧдлысьлӧн,

Россия Федерацияын Коми Республикаӧс петкӧдлысьяслӧн, Россия Федерацияса субъектъясын Коми Республикаӧс петкӧдлысьяслӧн, суйӧрсайса канмуяс мутасъясын Коми Республикаӧс петкӧдлысьяслӧн,

Коми Республикалӧн бӧрйысян комиссияса веськӧдлысьлӧн;

3) вермас сувтӧдсьыны уджалан жыръясын:

Коми Республикаса Каналан Сӧветлӧн комитетъясса веськӧдлысьяслӧн,

Коми Республикалӧн министерствоясса да олӧмӧ пӧртысь власьт мукӧд органса юрнуӧдысьяслӧн, Коми Республикалӧн канму органъясса юрнуӧдысьяслӧн,

Коми Республикаын морть инӧдъяс торъя дорйысьлӧн, Коми Республикаын асшӧр уджалысьяслысь инӧдъяс торъя дорйысьлӧн, Коми Республикаса Юралысь бердын кага инӧдъяс торъя дорйысьлӧн,

меставывса асвеськӧдлан органъясса юрнуӧдысьяслӧн,

Коми Республикаын федеральнӧй олӧмӧ пӧртысь власьт органъясса да налӧн мутас органъясса юрнуӧдысьяслӧн,

Коми Республикалӧн Медвылыс Ёрдса Веськӧдлысьлӧн,

Коми Республикалӧн Арбитражнӧй Ёрдса Веськӧдлысьлӧн,

Коми Республикаса прокурорлӧн,

районъясын федеральнӧй ёрдса веськӧдлысьяслӧн,

федеральнӧй ёрдысьяслӧн,

прокуроръяслӧн,

Коми Республикалӧн канму власьт органъясса юрнуӧдысьясӧс вежысьяслӧн;

4) вермас сувтӧдсьыны Коми Республикаын федеральнӧй ёрдлӧн ёрд заседание нуӧдан жыръясын;

5) вермас сувтӧдсьыны (либӧ сійӧс вермасны серпасавны) Коми Республикаса Юралысьлӧн, Коми Республикалӧн Каналан Сӧветса Веськӧдлысьлӧн транспортӧ.

Коми Республикалысь канму дӧрапассӧ позьӧ сувтӧдны (пуктыны) кыдзи джоджӧ пуктан флагшток вылын, сідзи и пызан вылӧ флагшток вылын, сы лыдын Россия Федерацияса канму дӧрапаскӧд ӧттшӧтш.

 

5(1) статья. Коми Республикаса канму дӧрапас кыпӧдігӧн сійӧс колӧ пуктыны мачталӧн (флагштоклӧн) вылысса юкӧнас.

Коми Республикаса канму дӧрапас пу (флагшток) дінӧ йитігӧн сійӧс колӧ йитны пулӧн (флагштоклӧн) вылысса юкӧнӧ.

Коми Республикаса канму дӧрапассӧ позьӧ ӧшӧдны путӧг да флагштоктӧг керкалӧн (кабинетлӧн) стенӧ — ӧти отӧн. Коми Республикаса канму дӧрапас путӧг (флагштоктӧг) ӧшӧдігӧн Коми Республикаса канму дӧрапассӧ колӧ пуктыны водса ногӧн (стӧчджыка кӧ дӧрапас визьясыс ӧткодьӧсь лоӧны водсанога веркӧслы).

 

6 статья. Коми Республикаса канму дӧрапаслысь серпассӧ:

1) позьӧ вӧчны груз да ветлысь-мунысьӧс Коми Республика мутасын новлӧдлысь организацияяслӧн налӧн котыртан-инӧда форма вылӧ видзӧдтӧг корабль, катер да судно бортъясӧ сэтшӧм ногӧн, кыдзи урчитіс Коми Республикаса Юралысь;

2) позьӧ используйтны Коми Республикаса канму наградаясын элементӧн либӧ геральдика подулӧн, а сідзжӧ торъя пасъяс вӧчигӧн сійӧ йӧзлы, кодъяс уджалӧны Коми Республикаса канму чинын да бӧръян муниципальнӧй чинын;

3) позьӧ используйтны мукӧддырйи сэтшӧм ногӧн, кыдзи урчитіс Коми Республикаса Юралысь.

 

7 статья. Коми Республикалӧн канму дӧрапас:

1) кыпӧдсьӧ (сувтӧдсьӧ):

официальнӧй церемонияяс да мукӧд кыпыд мероприятие дырйи, мый нуӧдӧны Коми Республикаса канму власьт органъяс, Коми Республикаса канму органъяс, меставывса асвеськӧдлан органъяс,

спорт мероприятиеяс дырйи, мый нуӧдӧны Коми Республикаса канму власьт органъяс, Коми Республикаса канму органъяс, меставывса асвеськӧдлан органъяс;

1-1) кыпӧдсьӧ (сувтӧдсьӧ) уна йӧза (сы лыдын спорт да вынйӧр сӧвмӧдан да дзоньвидзалун бурмӧдан) мероприятиеяс дырйи, мый нуӧдӧны эмбур сикас вылӧ видзӧдтӧг велӧдан организацияяс;

2) вермас кыпӧдсьыны (сувтӧдсьыны):

официальнӧй церемония да мукӧд кыпыд мероприятие дырйи, мый нуӧдӧны Коми Республикаын федеральнӧй канму власьт органъяс,

кыпыд мероприятиеяс дырйи, мый нуӧдӧны ӧтйӧза ӧтувъяс да организацияяс налӧн котыртан-инӧда форма вылӧ видзӧдтӧг,

семьяса торжествояс дырйи.

 

8 статья. Траур лунъясӧ Коми Республикаса канму дӧрапаслӧн пу выліас кӧрталӧны дӧрапас дӧра кузьта сьӧд лента. Мачта (флагшток) вылӧ лэптӧм Коми Республикалӧн канму дӧрапас лэдзыштсьӧ мачта (флагшток) джынйӧдз.

 

9 статья. Коми Республикалысь канму дӧрапас да мукӧд дӧрапас ӧттшӧтш кыпӧдігӧн (пуктігӧн) найӧс сувтӧдӧны тадзи, сувтны кӧ налы чужӧмӧн воча:

1) Коми Республикалысь канму дӧрапас да Россия Федерациялысь канму дӧрапас - Коми Республикалӧн канму дӧрапас сувтӧдсьӧ веськыдладорас;

2) Коми Республикалысь канму дӧрапас, Россия Федерациялысь канму дӧрапас да муниципальнӧй юкӧнлысь либӧ ӧтйӧза ӧтувлысь да организацияяслысь  налӧн котыртан-инӧда форма вылӧ видзӧдтӧг дӧрапас (дӧрапасъяс) - Коми Республикалӧн канму дӧрапас сувтӧдсьӧ Россия Федерациялӧн канму дӧрапассянь шуйгаладорас;

3) Коми Республикалысь канму дӧрапас да муниципальнӧй юкӧнлысь либӧ ӧтйӧза ӧтувлысь да организацияяслысь налӧн котыртан-инӧда форма вылӧ видзӧдтӧг дӧрапас - Коми Республикалӧн канму дӧрапас сувтӧдсьӧ шуйгаладорас;

4) дӧрапасъяслӧн лыдыс абу чётнӧй (Россия Федерацияса канму дӧрапастӧг) - Коми Республикалӧн канму дӧрапас сувтӧдсьӧ шӧрас;

5) дӧрапасъяслӧн лыдыс чётнӧй (но кыкысь унджык) (Россия Федерацияса канму дӧрапастӧг) - Коми Республикалӧн канму дӧрапас сувтӧдсьӧ шӧрсяньыс шуйгаладорас.

 

10 статья. Коми Республика мутасын Коми Республикалысь канму дӧрапас да мукӧд дӧрапас ӧттшӧтш лэптігӧн (пуктігӧн):

1) Коми Республикалӧн канму дӧрапас ыджданас мед вӧлі Россия Федерациялӧн канму дӧрапаскӧд, Россия Федерацияса мукӧд субъектлӧн дӧрапасъяскӧд ӧткодь;

2) муниципальнӧй юкӧнлӧн, ӧтйӧза ӧтувлӧн да организацияяслӧн налӧн котыртан-инӧда форма вылӧ видзӧдтӧг дӧрапас, мед эз вӧв ыджыдджык Коми Республикалӧн канму дӧрапасысь;

3) Коми Республикалӧн канму дӧрапас лэптан судтаыс мед вӧлі Россия Федерациялӧн канму дӧрапас, Россия Федерацияса субъектлӧн дӧрапас лэптан судтакӧд ӧткодь да мед эз вӧв улынджык муниципальнӧй юкӧнлӧн, ӧтйӧза ӧтувлӧн да организацияяслӧн налӧн котыртан-инӧда форма вылӧ видзӧдтӧг дӧрапас лэптан судтаысь.

 

11 статья. Коми Республикалӧн канму дӧрапас сылӧн ыджда вылӧ видзӧдтӧг рӧмнас да серпаснас мед вӧлі сэтшӧм жӧ, кутшӧмӧс вайӧдӧма тайӧ Оланпасын, да лӧсяліс корӧмъяслы, кутшӧмъясӧс индӧма тайӧ Оланпаслӧн 2 статьяын.

 

12 статья. Муниципальнӧй юкӧнъяслӧн, ӧтйӧза ӧтувъяслӧн да организацияяслӧн налӧн котыртан-инӧда форма вылӧ видзӧдтӧг дӧрапасъяс оз вермыны лоны ӧткодьӧсь Коми Республикалӧн канму дӧрапаскӧд.

Коми Республикалысь канму дӧрапас оз позь босьтны геральдика подув пыдди муниципальнӧй юкӧнъяслысь, ӧтйӧза ӧтувъяслысь да организацияяслысь налӧн котыртан-инӧда форма вылӧ видзӧдтӧг дӧрапасъяс вӧчигӧн.

 

13 статья. Коми Республикаса канму дӧрапасӧн тайӧ Оланпас торкӧмӧн вӧдитчӧмысь, а сідзжӧ Коми Республикаса канму дӧрапас пыдди пуктытӧмысь кыскӧны кывкутӧмӧ "Коми Республикаын административнӧй кывкутӧм йылысь" Коми Республикаса Оланпас серти.

 

Коми Республикалӧн Медвылыс Сӧветса Веськӧдлысь                                                             

Ю.СПИРИДОНОВ

 

Сыктывкар

1994 вося лӧддза-номъя тӧлысь 6 лун

XІІ-20/3 №

  

"Коми Республикалӧн канму дӧрапас йылысь" Коми Республикаса Оланпас дорӧ содтӧд - Коми Республикаса канму дӧрапаслӧн серпас

 

КОМИ РЕСПУБЛИКАСА ОЛАНПАС

КОМИ РЕСПУБЛИКАЛÖН КАНМУ КЫП ЙЫЛЫСЬ

 

 (2000.10.17 51-РЗ №-а; 2001.04.10 15-РЗ №-а; 2006.07.04 44-РЗ №-а; 2014.05.05 36-РЗ №-а КР-са оланпасъясӧн пыртӧм вежсьӧмъясӧн)

 

Россия Федерацияса оланпастэчас да Коми Республикаса Оланподув серти тайӧ Оланпасӧн лӧсьӧдсьӧ Коми Республикалӧн канму кып, сылӧн да сыӧн официальнӧя вӧдитчанног.

1 статья. Коми Республикалӧн канму кып лоӧ Коми Республикалӧн официальнӧй канму символӧн, кодлӧн могыс — видзны национальнӧй культуралысь традицияяс, Коми Республикаын олысь уна сикас войтырлысь ӧтувъялун.

Коми Республикалӧн канму кып — музыкально-поэтическӧй гижӧд, мый лӧсьӧдӧма Виктор Савинлӧн «Варыш поз» сьыланкыв серти.

2 статья. Коми Республикалӧн канму кып юргӧ:

1) Коми Республикаса Юралысьӧн уджӧ босьтчигӧн сыӧн ёрсьӧг сетӧм бӧрын да Россия Федерациялӧн канму кып юргӧм бӧрын;

2) Коми Республикалӧн Каналан Сӧветса Веськӧдлысьӧн уджӧ босьтчигӧн Россия Федерациялӧн канму кып юргӧм бӧрын;

3) Коми Республикалӧн Оланподув Ёрдса Веськӧдлысьӧн уджӧ босьтчигӧн Россия Федерациялӧн канму кып юргӧм бӧрын;

4) Коми Республикаын меставывса асвеськӧдлан органъясса (водзӧ — меставывса асвеськӧдлан органъяс) юрнуӧдысьясӧн уджӧ босьтчигӧн Россия Федерациялӧн канму кып юргӧм бӧрын, уджӧ босьтчан татшӧм пӧрадокыс кӧ урчитӧма федеральнӧй оланпастэчасӧн да (либӧ) Коми Республикаса оланпастэчасӧн;

5) Коми Республикалӧн Каналан Сӧветлысь сессия восьтігӧн да тупкигӧн;

6) Коми Республикалысь канму дӧрапас лэптан официальнӧй церемония дырйи да мукӧд официальнӧй церемония дырйи;

7) Коми Республикаӧ официальнӧя воысь суйӧрсайса канмуясса юралысьясӧс, суйӧрсайса канмуяслӧн веськӧдлан котырса юралысьясӧс, суйӧрсайса канмуясӧс официальнӧй петкӧдлысьясӧс, а сідзжӧ канмукостса да веськӧдлан котыркостса организацияясысь юралысьясӧс вочаалан да колльӧдан церемония дырйи дипломатическӧй протокол да оланпастэчас серти;

8) канму органъяслӧн да меставывса асвеськӧдлан органъяслӧн помшуӧм серти сувтӧдӧм памятникъяс да паметь пасъяс восьтігӧн Россия Федерациялӧн канму кып ворсӧм бӧрын;

9) Россия Федерацияса канму праздникъяслы, Коми Республикаса канму праздникъяслы да муниципальнӧй праздникъяслы сиӧм кыпыд собраниеяс  восьтігӧн да тупкигӧн Россия Федерациялӧн канму кып бӧрын;

10) эмбур сикасъяс вылӧ видзӧдтӧг общеобразовательнӧй организацияясын да уджсикасӧ велӧдан организацияясын — выль велӧдчан во заводитчан лунӧ медводдза урок (занятие) водзын, а сідзжӧ индӧм велӧдан организацияясӧн нуӧдан Россия Федерацияса канму праздникъяслы, Коми Республикаса канму праздникъяслы да муниципальнӧй праздникъяслы сиӧм кыпыд мероприятиеяс дырйи Россия Федерациялӧн канму кып ворсӧм бӧрын.

Коми Республикалӧн канму кып вермас юргыны:

1) киритӧма

2) Коми Республикаса канму наградаяс сетігӧн;

3) киритӧма.

4) киритӧма.

5) мукӧд кыпыд мероприятие дырйи, кутшӧмъясӧс нуӧдӧны канму органъяс, меставывса асвеськӧдлан органъяс, а сідзжӧ канму да абу канму организацияяс.

3 статья. Коми Республикалысь канму кып вермӧны транслируйтӧны теле- да (либӧ) радиовещание збыльмӧдысь дінмуса (Коми Республикаса) канму организацияяс:

1) выль вося войӧ, кор часі кучкас выль во воӧм, Россия Федерациялӧн канму кып юргӧм бӧрын;

2) телевидениеын республикаса телепрограмма эфирӧ петӧм водзвылын — Коми Республикаса канму праздник лунъясӧ;

3) радио пыр — быд лун Коми Республикаса медводдза радиопрограмма эфирӧ петӧм водзын да бӧръя радиопрограмма помасьӧм бӧрын.

4 статья. Суйӧрсайса канмуяс мутасын, кор официальнӧй мероприятиеясын участвуйтӧны Коми Республикаӧс официальнӧй петкӧдлысьяс, Коми Республикалысь канму кып ворсӧны дипломатическӧй протокол правилӧяс серти да воан странаса традицияяс артыштӧмӧн.

5 статья. Коми Республикалысь канму кып Коми Республика мутасын позьӧ ворсны спорт ордйысьӧмъяс нуӧдігӧн официальнӧй церемония дырйи — тайӧ ордйысьӧм нуӧдан правилӧяс серти.

6 статья. Коми Республикалысь канму кып позьӧ пыртны мукӧд шылада произведениеӧ да мукӧд сикас искусство произведениеӧ сэки да сэтшӧм ногӧн, кыдзи индӧма Коми Республикаса Юралысьӧн.

7 статья. Коми Республикалысь канму кып позьӧ петкӧдлыны оркестрӧн, хорӧн, оркестрӧн да хорӧн либӧ мӧд сикас сьылӧмӧн, инструментальнӧя ворсӧмӧн. Коми Республикалысь канму кып ворсігӧн позьӧ вӧдитчыны шыа гижӧдӧн.

8 статья. Кор Коми Республикалӧн канму кып юргӧ йӧз водзын, йӧзыс кывзӧны сійӧс сувтӧмӧн, мужичӧйяс — юркышӧдтӧг.

Сэк, кор Коми Республикалысь канму кып ворсігӧн лэптыссьӧ Коми Республикалӧн канму дӧрапас, йӧзыс бергӧдчӧны сылань чужӧмӧн.

9 статья. Коми Республикалысь канму кып колӧ ворсны лӧсьӧдӧм шылад серти, коми да роч кывъяс вылын текст серти, кыдзи вайӧдӧма тайӧ Оланпас дорӧ 1 да 2 содтӧдъясын, тайӧ Оланпаслӧн 7 статьяӧн урчитӧм положениеяс тӧд вылын кутӧмӧн.

Оз позь вежны Коми Республикаса канму кыплысь шыладсӧ, текстсӧ, кыдзи вайӧдӧма тайӧ Оланпас дорӧ 1 да 2 содтӧдъясын.

Коми Республикаса канму кыплысь юкӧнсӧ позьӧ ворсны оркестрӧн либӧ мӧд ногӧн инструментальнӧя (куплетсӧ ворсны ӧтпыр).

10 статья. Коми Республикалысь канму кып тайӧ Оланпас торкӧмӧн ворсӧмысь да сыӧн вӧдитчӧмысь,  Коми Республикалысь канму кып ворсігӧн тайӧ Оланпасӧн урчитӧм корӧмъясӧ кутчысьтӧмысь кыскӧны кывкутӧмӧ «Коми Республикаын административнӧй кывкутӧм йылысь» Коми Республикаса Оланпас серти.

 

Коми Республикалӧн Медвылыс Сӧветса Веськӧдлысь                                                      Ю.СПИРИДОНОВ

 

Сыктывкар

1994 вося лӧддза-номъя тӧлысь 6 лун

XІІ-20/5 №

 

«Коми Республикалӧн канму кып йылысь» Коми Республикаса  Оланпас дорӧ 1 содтӧд

 Коми Республикаса канму кыплӧн шылад редакция (шыладыс В.Савинлӧн М.Герцманлӧн обработкаын)

 (пыртӧма 2006.07.04 44-РЗ №-а КР-са Оланпасӧн)

Шылад редакция видзӧдӧй графическӧя.

 «Коми Республикалӧн канму кып йылысь» Коми Республикаса Оланпас дорӧ 2 содтӧд

 Коми Республикаса канму кыплӧн текст (кывъясыс В.Савинлӧн коми кыв вылын В.Тиминлӧн редакцияын, роч кыв вылын А.Шергиналӧн, А.Суворовлӧн редакцияын)  (пыртӧма 2006. 07. 04. 44-РЗ №-а КР-са Оланпасӧн).

Коми Республикаса канму кыплӧн аудогижöд